Izan al zarete inoiz Ikastolako ortuan? Bada, pasa den astean 1. eta 2. mailako ikasleak bertara joan ziren eta 4. mailakoek ikasturtean zehar egindako lana erakutsi zieten. Lan ederra, benetan!

Gainera, Naturaren Sekretuak proiektuaren barnean, eta ortua ondo zainduta egon dadin, 1. eta 2. mailakook txorimaloa egin genuen . Txorimaloa dagoeneko ortuan dago kokatuta. Dotore gelditu da; bai horixe!

Iazko ikasturtean hasitako esperientziarekin jarraituz, gure patioko baratzean neguko barazkiak eta loreak landatu ditugu. Aurten ere, 3, 4 eta 5 urteko ikasleek aza, zerba, porru, espinaka... sartu ditugu patioko ontzietan. Eta hemendik aurrera, ureztatu, zaindu eta nola handitzen diren ikusi eta behatuko dugu.

ETA ZUK ERE ZAINDU EZAZU. BEHATU ETA IKUSI BAI, BAINA EZ UKITU!

Gure ikastolako ortua dela eta laguntza paregabea izan genuen bertan jarri dugun itxabola muntatzen. Iñigo eta Ana Larrea aritu ziren haizearen eraginez nahiko triskilduta geratu zen txabola berregiten. Mila esker bioi.

Honen harira, berriro ere gurasooi gonbita luzatu nahi dizuegu gure ortu lanetan parte hartzera. Lana asko pilatzen zaigu, bereziki garai batzuetan, eta larri samar ibiltzen gara.  Ezagutza berezirik izan gabe ere lan asko egin daiteke. 

Eskola ortua proiektua dela eta, Goiena telebistakoak gurean izan ziren urriaren 16an. Gure ikasleekin baratzera joan eta bertan egiten dutenaren inguruko saioa grabatu zuten. Irakasleak ere elkarrizketatu zituzten eta proiektuak dituen helburuei buruz jardun zuten. Hemen duzue arratsalde horretan egindako lanaren emaitza ikusgai.