LH 5. mailako ikasleek sormenez beteriko lehenengo lauhilekoa osatu dute LAB IEMean. Bost asteko txandatan banatuta, hiru tailer ezberdinetan murgilduta aritu dira buru-belarri: antzerkigintza, txotxongilo mitologikoak eta Kamishibai.
Kamishibai tailerrean hizkuntzaren alderdi ludikoa eta sortzailea oinarri hartuta, ikasleek beraien ipuinak ekoitzi dituzte. Baina lana ez da hor geratu; prozesuari amaiera borobila emateko, Haur Hezkuntzako geletara joan dira sortutako istorioak kontatzera. Oso dinamika polita sortu da txikienen eta nagusien artean, eta ikasleak oso gustura aritu dira egile zein irakurle lanetan.
Txotxongilo mitologikoen tailerrean, Euskal mitologiaren bidez, gure herriko kultura eta tradizioak sakonago ezagutzea izan da helburua. Pertsonaia mitologikoak eta kondairak landu ondoren, ikasleek beraien txotxongiloak sortu dituzte. Lan hori guztia balioan jartzeko, erakusketa berezi bat antolatu dute LHko etapa osoarentzat, egindako sormen-lanak ikusgai jarriz.
Antzerkigintzan ere gogor aritu dira lanean lehenengo hilabete hauetan. Kasu honetan, tailerrak bigarren lauhilekoan izango du jarraipena: beste bost aste izango dituzte proiektua borobiltzeko.
Ziur gaude emaitza harrigarria izango dela!
