Gaur gauean, San Juan bezpera honetan, 22:30ean, Udako solstizioaren jaia ospatuko da Olaitturrin. Oñatiko Udalak jai hau antolatzeko laguntza eskatu zuen, eta Txantxiku ikastolako guraso taldeak, gure ikastolaren 55. urteurrenaren testuinguruan eta euskal kultur ondarearen ezinbesteko jaia dela kontuan izanda, ekitaldiari eutsi beharra zegoela garbi ikusi zuen. Horiek horrela, udaleko ordezkariei laguntza emateko gure prestutasuna erakutsi genien, eta, ondorioz, jaia antolatu da.
Oñatiko udaleko brigadakoek txondorra prestatu dute dagoeneko, eta, gaur gauean Oñatz dantza taldeko dantzariek, Aita Madina txistulari taldeko kideen laguntzarekin, hainbat dantza eskainiko dituzte. Bertaratuko garenok egun honetarako egokitutako kopla batzuk abesteko aukera ere izango dugu. Gogoratu, sinbolikoki, suak baduela “arazte/garbitze” betekizun bat ere hari begira gaudenongan. Beraz, animatu zaitezte eta zatozte gurekin jaiaz gozatzera!
