Txantxiku Ikastolako Batxilergoko 2. mailako Jarduera Fisikoa, Osasuna eta Aisia irakasgaiko ikasleok osasunari buruzko jardunaldi bereziak antolatu ditugu, guztion ongizatea eta harreman sozialak sustatzeko. Osasuna ikuspegi integral batetik landuko dugu, aste osoan zehar ekintza ugari eskainiz. Jarduera batzuk adin desberdinetako ikasleen arteko elkarrekintzan oinarrituko dira, eta beste batzuk talde bakoitzaren beharrak sakonago aztertzeko balioko dute.
Ekintza bakoitzaren helburua argia da: gorputza eta burua zaintzea, jarduera fisikoaren eta osasun mentalaren garrantzia ulertzea eta harreman sozialen inguruko hausnarketa sustatzea. Hauxe da proposatzen dizuegun egitaraua:
🟢 Bizi Hadi taldearekin tailerra
Osasun Astea hasteko, Bizi Hadi taldearekin tailer bat egingo dugu. Bertan, hasieran hitzaldi bat eta ondoren joko dinamikoak egingo ditugu bertako talde inklusiboekin. Osasun mentala zaintzeko gomendioak emango dizkigute.
👵 Zaharren egoitzara bisita (Batxi 2ko JAOKO ikasleak) – Apirilak 7
JAOko ikasleek San Martineko zaharren egoitza bisitatuko dute, adineko pertsonekin denbora partekatu dute, elkarrizketak izan eta jolas dinamikoak egingo dituzte beraiekin. Helburua adinekoen ongizatea sustatzea eta belaunaldien arteko loturak sendotzea da.
💪 Indar saioa (DBH4) – Apirilak 9
DBH 4ko ikasleentzat indarra lantzeko saio berezi bat antolatu dugu. Bertan, giharrak indartzeko ariketak, teknika egokiaren garrantzia eta lesioen prebentzioa bezalako gaiak jorratuko ditugu. Jarduera guztiz praktikoa izango da, eta batez ere gimnasioan hasteko asmoa duten pertsonek teknika egokia ikasi eta entrenamendu eraginkorrak egiteko baliabideak eskuratu ahal izango dituzte.
🧠 Osasun mentalaren hitzaldia (DBH4, BATXI 1-2) – Apirilak 10
Gure taldekide Oierrek eta Marenek osasun mentalari buruzko hitzaldi bat eskainiko dute, bereziki ikasketa arloan zentratuta. Bertan, osasun mentalaren garrantziaz hitz egingo digute, ikasleen ongizatea eta errendimendua hobetzeko estrategiak azpimarratuz.
Hitzaldian, hainbat gonbidatu berezi izango ditugu, eta haiek gaiaren inguruko ezagutza sakonak partekatuko dituzte ikasleekin. DBH4, Batxilergo 1 eta Batxilergo 2ko ikasleei zuzendutako saioa izango da.
🏔️ Mendi irteera (DBH1 - BATXI 2) – Apirilak 16
Apirilaren 6an, ikasle guztiok mendi-irteera bat egingo dugu. Maila guztietako ikasleek parte hartuko dute, eta helburua kirola egitea, naturaz gozatzea eta elkarlana sustatzea izango da. Ibilaldiaren ostean, barrita energetikoak emango dizkiegu ikasleei, elikadura osasungarriaren garrantzia azpimarratuz.
Osasun Jardunaldia guztiontzat antolatu dugu, eta ekintza hauek aukera paregabea dira osasunaren ikuspegi integrala lantzeko, gorputza, burua eta emozioak zaintzeko. Osasuna ez da soilik kirola egitea eta elikadura osasungarria izatea; harreman sozialak, ongizatea, eta emozioen kudeaketa ere garrantzitsuak dira bizitza osasuntsu bat izateko. Txantxiku Ikastolako Osasun Jardunaldia elkarrekin ikasteko eta bizitza osasuntsuagoa eta orekatuagoa egiteko aukera paregabea da.
