Atzo arratsaldean aurkeztu genituen ofizialki Ikastolen mugimenduaren marka eta leloa Bergarako Seminarixoan egindako Ikastolen Ikasturte Hasiera Ekitaldian: logotipo berria “1kastolak” eta leloa “Bagatoz!”. Aurrerantzean, IKASTOLAK izango da mugimendua izendatzeko erabiliko dugun hitza; hitz- eta marka-aldaketak komunitatearen indarra eta batasuna nabarmentzen ditu: zazpi lurralde, 115 ikastola, bat; aniztasuna eta ausardia, denok ikastola. Ekitaldian, Palestinarekin elkartasun keinu bat ere egin zen.
Irudi berriak garai berrietara egokitzeko urratsa dira, betiko balioekin: auzolana, euskalduntasuna, naziotasuna eta gizartearekiko konpromisoa. Sareak gaur egun 55.500 ikasle, 46.000 familia eta 3.700 profesional biltzen ditu. Iazko Zazpigarren Batzarrean hartutako erabakiak martxan jartzeko ikasturtea da: erronka nagusiak dira aniztasuna eta ekitatea; kulturen arteko harremanak; euskararen erabilera eta kultur transmisioa; gure lurraren etorkizuna; lurralde arteko sareak; garapen pertsonala eta elkarren zaintza; eta lan-mundua eta gizarte-onura. Horri erantzuteko, pertsona erdigunean jarriko duen eredu baterantz egingo dugu, digitalizazioari neurria hartuz eta euskararen erabilera indartuz.
#Ikastolak #Bagatoz
Txantxiku Ikastola, komunikazioan ere hobetzen
Datozen hilabeteetan, Txantxiku Ikastolak komunikazio-plana garatuko du AZK enpresaren aholkularitzarekin: Oñatiren ahotsa entzun, gure nortasuna zehaztu eta marka propioa eraikiko dugu. Horretarako, hausnarketa-talde anitzak (familia eta langileak, zuzendaritza, ikasle eta langile ohiak, elkarteak, etorkinak…) aktibatuko ditugu; bilduko dugunarekin, marka estrategietan txertatuko dugu, helburu argi batekin: egiten duguna herrira iristea eta komunitatea sendotzea.
