LH 3. eta 4. mailakook PROI-aren amaierara iritsi gara, eta bidean egindako lanari esker, euskarazko musikaren indarra, aniztasuna eta aberastasuna ezagutzeko aukera izan dugu. Ikerketa baten bidez, euskal musikaren egungo egoeran murgildu gara: talde eta sortzaile berriak deskubritu ditugu, estilo askotarikoak aurkitu, eta euskarazko kantuek gure gizartean, kulturan eta emozioetan duten garrantziaz jabetu gara. Prozesu horrek ezagutza berriak ekarri dizkigu, baina batez ere, gure interesa piztu, entzumen-ohiturak zabaldu eta euskal musikarekiko lotura sendotu du.
Ikasitakoa eta bizitakoa ikastolako komunitatearekin partekatzeko asmoz, euskarazko kantuen zerrenda bat osatu dugu, QR kode baten bidez entzungai egongo dena: proposamen berriak ezagutzeko, doinu desberdinak entzuteko, hitzetan sakontzeko eta, azken finean, euskarazko musikan murgiltzeko. Guk egin dugun bezala, zuek ere aukera izan dezazuela musikaren bidez euskararekin konektatzeko eta gozatzeko.
Euskarazko musika bizirik dago, kalitatez beteta dago eta… demasa da!
