Pasa den astean, LH 4. mailako ikasleok Natur Eskolara irteera egin genuen, urak gure egunerokotasunean eta gure planetan duen garrantziaz jabetzeko helburuarekin. Izan ere, ura ezinbesteko baliabidea da bizitzarako, eta horregatik, beharrezkoa da haren erabileraz hausnartzea eta zaintzearen garrantziaz konturatzea.
Irteeran zehar, uraren erabilera urteetan zehar nola aldatu den ikasteko aukera izan genuen. Oñatin, antzinan urari ematen zitzaion erabilera ezagutu genuen, eta horretarako hainbat toki bisitatu genituen, besteak beste, Larrañako puxeta edo labaderoa eta liñapotzua, eta Olabartako puxeta eta errota. Oso interesgarria izan zen garai bateko uraren erabilera gertutik ezagutzea, eta ikasleek asko gozatu zuten esperientziarekin. Antzinako ohiturak ezagutzea funtsezkoa dela konturatu ginen, gaur egungo errealitatea hobeto ulertzeko. Eskerrik asko, beste behin, Natur Eskolako lagunei, eskainitako azalpenengatik eta bizitako esperientziagatik!
