Pasa den egubakoitzean, DBH 2. mailakook Hemen-eko ‘Gernikaren bilobak’ unitatean ikasitakoak bertatik bertara ikusteko asmoz, Gernikara txangoa burutu genuen. Han Bakearen Museoa eta Batzar Etxea bisitatu genituen. Museoan bonbardaketaren nondik norakoak hobeto ezagutu genituen eta, besteak beste, garai hartako bizilagun baten etxean sartzeko aukera ere izan genuen: bonbardaketa eguna simulatzen zen instalazio batean, zarata, argiak, kea eta suntsiketa lehen pertsonan sentitu genituen.
Batzar Etxean, haritzaren azpian garai bateko bizkaitarrek egiten zituzten batzarrak eta gure foruak gogoratu genituen, eta noski, Gernikako Arbola ere ikusi genuen. Bukatzeko, gida batekin batera Gernikako hainbat kaleetan herritarrek babesteko erabili zituzten lur azpiko aterpeak edota babeslekuak ere bisitatu genituen. Irteera ederra eta hunkigarria izan zen!
