DBH 3. mailako sei ikasle Goiena komunikazio taldearen egoitzara joan dira Galdegazte saioa grabatzera. Programan elkarrizketatua Izar Mendiola artista eta ilustratzailea izan da. Ikasleen artean, hiruk kazetari lanak egin dituzte, elkarrizketa prestatuz eta zuzenean galderak eginez. Beste hiru ikasleak, berriz, errealizazio gelan egon dira, programaren grabazioaren atzean egiten den lan teknikoa ezagutzen eta bertan laguntzen.
Saioa grabatu aurretik, ikasleek lanketa egin dute gelan: elkarrizketaren gaia prestatu, galderak pentsatu eta komunikazioaren inguruko hainbat alderdi landu dituzte. Esperientzia oso aberasgarria izan da ikasleentzat, komunikabideen funtzionamendua gertutik ezagutzeko eta kazetaritza munduan lehen urratsak emateko aukera izan baitute.
