Hika, hika, hika, hemen dator Korrika!

Bihar hasiko da Atharratzen Korrikaren 24. edizioa, eta, martxoak 28an, zapatuan, igaroko da Oñatitik goizeko 05:00ak aldera. Txantxiku ikastolak honako bi kilometro hauek erosi ditu: 2792.kilometroa – Hilerrirako irteera hartuta aldapako lehen farolatik ikastola aurreraino –, eta 2803.kilometroa – Zubillaga auzoan etxe larrosan ondoko zebrabidetik Zubi-plast enpresaraino. Beraz badakizue, oinetako erosoak jantzi eta batu Korrikara.

Ohitura jarraituz, martxoaren 27an, egubakoitzean, Korrika txikia ospatuko dugu ikastolan. Honako egitaraua antolatu dugu:

HAUR HEZKUNTZA

• 0 eta 1 urtekoek ikastolako jolaslekuan ospatuko dute Korrika goizean zehar.
• 2 urtetik hasi eta 5 urte arteko ikasleek, berriz, goizeko 10:30ean herriko plazan aurrez markatuta izango duten zirkuituan egingo dute antxintxika.

LEHEN HEZKUNTZA

• Lehen Hezkuntzako ikasleek herriko gainerako ikastetxeekin batera, herriko kaleetan zehar egingo dute korrika, lekukoa txandakatuz. Arratsaldeko 15:00etan hasiko da ekintza plazan.

Euskara gara!