Duela hiru aste, otsailaren 20an, 5. mailako ikasleok Bizipoza erakundeko parte den Trauti elkartearen bisita izan genuen. 2012an sortutako taldea da Trauti, Oñatiko irisgarritasun beharrak aztertu eta martxan jartzeko eta hainbat jarduera eramaten dituzte aurrera: sentsibilizazio kanpainak ikastetxeetan, elkarlana udalarekin, mugikortasun zailtasunak dituzten pertsonentzako irteerak antolatzea...
Behin Trauti elkartearen nondik norakoak azalduta, bertaratutako kide bakoitza ezagutu eta galderak egiteko aukera izan genuen. Gauza interesgarri pila bat ikasi genituen solasaldian zehar: mugikortasun zailtasunak dituzten pertsonak nola janzten diren, erabiltzen dituzten laguntzarako tramankuluak, nola gidatu edota bidaiatzen duten, zer gertatzen den uretara erortzerakoan... Eta guztioi gogoan gelditu zitzaigun esaldia: “zuretzat eskailera-maila bat besterik ez dena, beste norbaitentzat Everest izan daiteke.”
Aparkaleku urdinak errespetatzearen beharra, espaloiak libre uztea edota zailtasunen bat duen pertsonaren bat laguntza beharrean ikusten badugu, beragana gerturatu eta laguntza eskaintzeaz ere hitz egin genuen, besteak beste. Beraz, irakurle, zuk ere kontuan izan itzazu aipatu ditugunak eta erraztu iezaiozu egunerokoa alboan duzunari. Mila esker bisitagatik Mikel, Karmele, Lukene, Urdin, Isabel, Santi eta Oneka!
