"Jaten duguna garela" aspaldiko kontua da. Baina, ba al dakigu zer jaten dugun? Nondik ote datoz etxean, ikastolan... mahai gainean prest izaten ditugun barazki goxoak? Eta hortik ideia...

Baratze ttipi-ttipia Ikastolan izatea nahi genuen. Geure txikienen jakin-min asegaitza! Natura beraiengana gerturatuz, naturatik ikasiz. Eta landatzeko ontzia behar. Orduan... Non landatu? Nola landatu? Guztiok ikusteko bezalakoa izan zedin, Josebak egin zizkigun egurrezko landaketa mahaiak: hirurak itxura dotorekoak. Eskerrik asko Joseba!

Eta ondoren, heldu zen geure lana: 3, 4 eta 5 urteko ikasleen jarduna, lan txukuna benetan: patata, letxuga, tomate, kalabazina... barazkietan errege-erregina. Marrubiak, udaberriko fruta erakargarriak. Eta erromeroa, eta perrexila... janari ongarriak. Mila esker Itxaso eta Urbieta baserriko familiari! Zuek emandako letxuga eta tomateak ederto zainduko ditugu!

Orain, ura bota, goxo-goxo zaindu eta landare bakoitzak zer ematen digun ikustea besterik ez zaigu geratzen.