DBH 1. mailako ikasleak Ezkioko Igartubeiti baserria bisitatu genuen abenduaren 11an. Bertako museoan azalpenak jasotzeaz gain, baserria eta bere sagardorako dolarea ikusi genuen. Begiraleen azalpenez lagundurik XVII. mendeko baserri bizimodua ezagutzeko aukera paregabea izan zen.

Aurten ere DBH 1. mailako ikasleok bertsolaritza landu dugu Mirari Sagarzazu irakaslearen laguntzaz. Urte osoan zehar egindako lana erakutsi asmoz, maiatzaren 27an, Santa Ana antzokian emanaldi ederra eskaini genien gure senitartekoei. Gure bertsolari sena piztu eta zenbat disfrutatu dugun! Eskerrik asko Mirari!

Maiatzaren 9an DBH1-ekook Ekainberri bisitatu genuen. Goiza Aizarnazabal eta Zestoa inguruetan ibilaldia eginez hasi genuen. Eguraldi ederra lagun, gustura ibili ginen bertako paisaiak gozatuz.  

Eguerdian Ekainberrira hurbildu eta gelan landutako historiaurreko gaia sakontzeko aukera bikaina izan genuen: paleolitoko gizakiaren bizimodua, erabiltzen zituzten ehiza teknikak, artea... Egun borobila, benetan!

DBH 1. mailako ikasleek gelan landutako historiaurrea eta antzinaroa gaiak hizpide harturik, Lehen Hezkuntzako 1. mailako ikasleentzat aurkezpenak egin genizkien apirilaren 2an. Lehen Hezkuntzako 1. mailakoek ere "Lehen Gizakia" gaia orain dela gutxi jorratu dutenez, oso gustura aritu ziren ikasle zaharragoei entzuten eta beraiek gaiari buruz zekitena kontatzen.

Oso esperientzia polita eta aberasgarria izan da!

Martxoaren 25ean eta 26an, DBH 1. mailako hiru gelak irteera egin genuen Arantzazu ingurura, Natur Eskolako begiraleek lagunduta. Bidean, harriei, mineralei eta paisaiari buruzko azalpenak jaso genituen. Horrez gain, Aizkirri kobazuloan sartu eta hezur aztarnen bila jardun ginen eta Arantzazu errekaren iturburua ere ikusi genuen.

Eguraldi ona lagun, bete beteko egun pasa izan zen!

Martitzenean, abenduaren 18an, Iruñera joan ginen DBH 1. mailako ikasleekin. Lehenik, Planetarium-era hurbildu eta gure zerua, izarrak, sateliteak eta abar luzea ikusi genituen, gelan landutako unibertsoaren gaiari amaiera emanez. Ondoren, hiri erdirantz joan eta San Ferminetan zezenek egiten duten ibilbidea egin genuen oinez. Egun ederra pasa genuen, benetan!

ARGAZKIAK