Abenduaren 11n eta 18an, Haur Hezkuntzako 5 urteko haurrak eta Lehen Hezkuntzako 6. mailako ikasleak Oñatiko San Martin egoitzan eta Eguneko Zentroan izan ziren, eta bertan bizipen aberatsez gozatzeko aukera izan zuten.

Pasa den egubakoitzean, urriak 27, Lehen Hezkuntzako 6. mailakoak Zumaiara joan ginen, eta bertan, flysch-a aztertzen egon ginen. Irteera hori EKI proiektuko ‘Gu gara lurra bera’ unitatearen jarduera osagarri gisa antolatu genuen.

Zumaiako Algorri natur baliabideen interpretazio zentroan hainbat azalpen jaso ostean, ibilaldia egin genuen flysch-a bertatik bertara ikusteko. Eguraldia lagun, egun ederra igaro genuen Zumaian, eta gure arteko harremanak sendotzeko ere aukera paregabea izan genuen.

Aste honetan Atzegi Elkarteko Aloña Agirre izan da 6. mailako ikasleokin. Atzegi adimen urriko pertsonen alde lana egiten duen Gipuzkoako elkartea da. Haien helburuetariko bat da kolektibo honen balioaz sentsibilizatzea eta inguru positiboa sortzea, gizarteak onartu, balioetsi eta eskubide osoko partaidetzat jotzen dituela sentitu dezaten.

Hausnarketa horixe proposatu digu Aloñak, adimen urriko pertsonek bizi duten errealitatea aurkeztuz eta haien nahiak eta gogoak ezagutaraziz. Mila esker Aloña. Orain “atzegizaleagoak” gara.

A ze istorio zirraragarria bizi izan genuen 5. eta 6. mailako ikasleok Face to Face-eko aktoreekin!!! Sweeney Todd ile-apaintzaileak erregina hil zuen, eta Mrs Lovettek gorpua saltxitxak egiteko erabili zuen!!! Shirley Holmes inspektore ospetsuaren eta bere laguntzaile Dr Watsonen esku egon zen misterioa ebaztea, baina bidean beste hainbat gorpu edo hilotz agertu ziren. Azkenean, gure ikasleen laguntzarekin, hiltzailea atxilotu ahal izan zuen Shirleyk.

Otsailaren 25ean, 6. mailako ikasleak Donostiara joan ginen. Goizean, Zientziaren Museoari bisita gidatua egin ondoren, "Kimikaren magia" tailerrean parte hartu genuen. Oso dibertigarria eta interesgarria iruditu zitzaigun, hainbat momentutan geure burua zientzialari ikusi baikenuen. Ondoren, Txuri Urdin izotz jauregian patinatzeko aukera izan genuen. A zelako barreak!

Gureak Taldeak antolatzen duen “NiZuBezala” programan, aurten ere, LH 6. mailako ikasleak parte hartu dute. Desgaitasunaren inguruan sentsibilizazioa eta gerturatzea eragitea da helburua.

Oso esperientzi aberatsa izan da eta ikasleek gustura jardun dute.

LH 6. mailako ikasleok, ingeleseko Apprentice Chef gaiari amaiera emateko, “Sandwich Bar” bat antolatu genuen Gabonetako oporren aurretik. Argazkietan ikus dezakezuen bezala, talde bakoitzak bere tabernari izen ezberdina eman zion gaiaren arabera (kirolak,komikiak,maitasuna...). Gaiarekin lotura zeukaten sandwichak, posterrak eta elkarrizketak sortu genituen. We had a great time!!!