Otsailaren 23an Donostiara joan ginen. Goizean, Eureka zientzia museoaren bisita gidatua izan genuen eta kimikaren magia tailerrean parte hartu genuen. Oso interesgarria izan zen. Bazkalostean, aldiz, Txuri Urdin izotz jauregian patinatzeko aukera izan genuen. Zeinen ondo ibili ginen!

Otsailaren 10ean, Txanelan odolaz lantzen ari garen gaiarekin lotuta, Gipuzkoako Odol Emaileen elkarteko bi erizainen laguntzarekin informazio interesgarria eskuratzeko aukera izan genuen: ikerkuntzan eman diren pausoak aztertu, odolaren osagaiak, odol taldeak, transfusioen garrantzia... Beraien esanetan, oraingoz odola ez da fabrikatzen, eta hortaz, odol emaileak dira bizitzarako ezinbestekoa den gai hori lortzeko bide bakarra. Benetan interesgarria! Erizainek erakutsi duten jarrera ere, bikaina! Eskerrik asko bene-benetan.

6. mailako ikasleek gelan egindako artelanekin erakusketa bat antolatu dute mailako gurasoentzat eta LHko ikasleentzat. Horrekin, Lengua Castellanako UNA GALERÍA DE ARTE unitate didaktikoaren proiektua gauzatu dute. Erakusketa horretan buztinez, kartulinaz... egindako eta kontrastez betetako eskulanak ikusi ahal izan dira.

Urriaren 31n LHko 6. mailako ikasleak Arantzazura joan ginen.  Bertan euskal artisten obrak behatu eta horien gainean hainbat informazio jaso genuen. Arratsaldea, berriz, Arrikrutzen pasatu genuen. Han Euskal Herriko haitz mota desberdinak aztertu ondoren, kobazulora sartu eta, urak egindako higadura lanaz jabetzeaz gain, bertako edertasunaz gozatzeko aukera izan genuen. 

Bai Arantzazun, baita Arrikrutzen oso harrera ona izan genuen.

Ikasturtean zehar bertsolaritza arloan, hizkuntzaren alderdi ludikoa lantzeaz gain, ahozkotasuna eta euskararen erabilera ere jorratu ditugu. Egindako lanari bukaera emateko, maiatzaren 28an, bertso-­saioa izan genuen Santa Ana antzokian. Bertan gure bertsolari sena erakutsi genuen eta txalo zaparrada ederrak jaso genituen.

LHko 5. mailakoak maiatzaren 12an, goizetik, Araian dagoen Nestle izozki lantegia bisitatu genuen. Bisitaren bukaeran bertan eginiko izozkiak dastatzeko aukera ere izan genuen. Zein gozoak zeuden!!! Eguerdian Zuhatzara heldu ginen, eta bertan makina bat jarduera egin genituen.