Hotz Oñatik, urtero legez, janari bilketa antolatu du herriko supermerkatuetan. Aurtengoan, eguenetik zapatura egingo dute kanpaina. Eta jasotako janaria Lesboseko errefuxiatuei bideratuko zaie.

Ekimen hau aurrera eramateko 100 bat lagunen partehartzea eskatu dute, eta Txantxiku Ikastolatik gure aportazioa egin nahi izan dugu. Batxilab proiektuetan Hotz Oñatirekin hasitako elkarlanari jarraipena emanez, Batxilergoko 1. mailako ikasleak boluntario gisa aritu dira eta oso esperientzia aberasgarria izan dela diote.

Irailaren 11n Kosice hiriko 30 ikasle etorri ziren Oñatira Txantxiku Ikastolako batxilergoko 1.mailako ikasleekin elkartrukea egiteko. 2004an martxan jarritako ekimena da hau eta bi urtez behin burutzen dugu gure ikastolan. Oñatiar ikasleen etxeetan ari dira astea pasatzen eta ekintzaz beteriko izan dute aurretik: Gasteiz, Bilbo edo Donostiako hiriburuak ezagutzeaz gain, Urbiara igo dira, herri kiroletan aritzeko aukera izan dute eta gure Ikastolako proiektu berriak ezagutu dituzte.

Batxilergo 1. mailako ikasleak Zumaian izan ziren ekainaren 2an bertako flyscha ezagutzen. Han irteera geologikoa egin zuten "Begi bistan" taldeko begiraleekin. Ondoren hondartzan egoteko astia izan zuten. Oso gustura ibili ziren.

Batxilergo lehen mailako ikasleok Mondragon Unibertsitatearen Arrasateko fakultateko mekanika-tailerretara joateko aukera izan dugu aste honetan. Industria Teknologia gaiko programaren barruan, azken hiruhileko honetan, mekanizazio prozedurak lantzen aritu gara eta beraien artean, tornuan eta fresadoran aurrrera eraman daitezkeen operazioak ere ikusi ditugu. Ikastolan maila teorikoan gai hauek ezagutu ondoren, MUren eskutik, beraien tailerretan eta bertako irakasleek gidatuta, praktika batzuk egiteko aukera izan dugu.

Apirilaren 14an, Arrasateko Aita Menni ospitalera egin genuen bisita Batxilergo 1. mailako ikasle eta  tutoreok. Han, hasierako azalpena entzun ondoren, hiru taldetan banatuta bertako instalazioak eta gaixoen eguneroko aktibitateak ezagutu genituen. Oso interesgarria iruditu zitzaigun. Normalean ezagutzeko aukerarik izaten ez den errealitatea ezagutu genuen.

Udazken Kulturalari amaiera emateko luxuzko bisita izan genuen Batxilergo 1. mailako ikasleok. Aitor Arregi zinegile oñatiarrarekin tertulixan izan ginen. Bisitaren aurretik berak ekoiztutako "Loreak" filma ikusi genuen. Pelikularen gidoiaren idazleetako bat da Aitor. Euskarazko filma honek Espainia ordezkatuko du Oscarretarako lehian eta,  gaur egun, Estatu Batuetako zine akademiaren galbahea pasatu zain dago. Horretaz eta beste hamaika kontuez aritu ginen gustura Aitorrekin.

Maiatzaren 1etik 7ra eslovakiar lagunak izan ditugu Oñatin. Esperientzia bikaina izan da. Ikasleek beraien artean harremanak sendotzeko eta ingelesez aritzeko aukera paregabea izan dute. Aldi berean, eslovakiarrek gure herria, kultura eta hizkuntza ezagutu dituzte. Eskerrik asko elkartrukea aurrera eramaten lagundu diguzuen guztioi.

Baketik-en eskutik eta Donostia 2016 Europako Kultur Hiriburuaren ekintzen barruan, Antzerki Forum saioa izan zuten Batxilergo 1eko ikasleek. Lehendik  ezaguna dugun antzerki bidezko hausnarketa eta gogoeta dinamika honen bitartez gure herriaren elkarbizitza eta adiskidetze prozesuaren gaia landu genuen oraingo honetan. Esperientzia ona izan zen, beharrezkoa izateaz gain.

Eslovakiako ikasleekin egiten duten trukaketa finantzatzeko ekintzen barruan, kirol-jertse ederrak atera dituzte Batxilergoko 1.mailako ikasleek, baita txikienen neurrikoak ere. Hauek ikusi eta erosi ahal izateko mahaia jarriko dute ikastolako kiroldegi aurreko sarrera-irteeraren ate ondoan, 16:30ean. Kirol-jertseek (sudaderek) 20 euro balio dute, eta mahaietan eskaerak egiteko unean ordaindu ahal izango da. Momentuz hiru egunetan jarriko da mahaia, martxoaren 13an (egubakoitza), 16an (astelehena) eta 17an (martitzena).