Ostegunean hilak 1 Lastur aldera jo genuen ikasturteko azken txangoan Agaiti Debaventurara joan ginen. Bertan Paintballean aritu ginen ordu pare batez.

Otsailak 11n, Batxilergo 2. mailako ikasleok, Zuzenbidean lantzen ari ginen Unitate didaktikoaren jarduera zela eta, Bidebarrieta kalean dagoen Oñati Udaleko Enplegu Zerbitzuaren bulegoan izan ginen. Bertan Unai Kortabarria  teknikariak zerbitzuaren inguruko azalpenak eskaintzeaz gain, gure galderak ere erantzun zituen. Mila esker Unai, eskaini zenigun tarteagatik eta gurekin izan zenuen begiruneagatik.

Batxilergo 2. mailako Zientzia eta Teknologiako ikasleak MU-ren zientziaren astean izan ziren. Bisita honen bitartez zientzia eta teknologiaren barruko zenbait arlotan egiten dituzten ingeniaritza eta ikerketa lan batzuk ezagutu ahal izan zituzten.

Batxilergo 2ko ikasleentzat antolatzen dugun orientazio programari lotuta, geure ikasle ohiak etorri ziren azken saioan. Bakoitzak bere ibilbide eta bizipenak azaldu zizkigun, eta bata bestearengandik horren ezberdinak izan zirenez, oso saio interesgarria eta aberatsa osatu genuen. Ikasle ohiei denborak eta esperientziak eman dien eskarmentuari esker zalantzen inguruko hausnarketa egiteko parada ezin hobea izan zuten gure ikasleek. Eskerrik asko seikote, eta hurrengoa arte.

Asteazkenean Batxilergo 2ko ikasleok Zuzenbidean lantzen ari ginen Unitate didaktikoaren jarduera zela eta Bidebarrieta kalean dagoen Oñati Udaleko Enplegu Zerbitzuaren bulegoan izan ginen. Bertan Jesus Mari Ugarte teknikariak zerbitzuaren inguruko azalpenak eskaintzeaz gain, gure galderak ere erantzun zituen. Mila esker Jesus Mari, eskaini diguzun tarteagatik eta gurekin izan duzun begiruneagatik.

Batxilergo 2ko ikasleentzat antolatzen dugun orientazio plangintzaren barnean, bisita bikoitza izan genuen joan zen astean. Alde batetik, Arte Ederretako fakultatetik etorri zitzaizkigun sorkuntza, kultura ondarea eta artearekin lotutako graduen berri ematera. Bestetik, Gizarte Langintzako Unibertsitate Eskolakoak ere etorri zitzaizkigun graduari buruzko xehetasunak ematera eta ondoren izango duten lan esparruaren inguruko hainbat kontu azaltzera. Mila esker guztiei.

Pasa den ostegunean, abenduaren 4an, Oñatiko Udaleko Iosu Lizarralde etorri zen Batxilergoko 2.mailako geletara Txantxia, Oñatiko moneta soziala, aurkeztera. Azaroan martxan jarritako ekimen berri honek, tokiko saltoki txikiak sostengatzea du helburuetako bat.

Azaroaren 25ean, Batxilergo 2ko ikasle batzuk eta  orientatzailea,  BIODONOSTIAra joan ginen.  Azkenaldi honetan Biologia munduan egiten ari diren ikerkuntzen berri jaso genuen. Aritzek, bertako ikerlari batek, Osasun Ikerketa Institutu honen nondik norakoa azaldu zigun eta hainbat lankiderekin esku artean dituzten ikerketak erakutsi zizkigun. Hainbat metodo erabiliz, arazo gehien ematen dituzten gaixotasunei (alzheimerra, minbizia… ) aurre egiteko ikerlanak azaldu zizkigun. Zinez interesgarria!

Batxilergo 2ko ikasleok Orientazio plangintzaren barnean antolatzen dugun bisita programari eman diogu hasiera beste behin. Azaroaren 21ean izan genuen lehen saioan, Leioako EHUko Zientzia eta Teknologia fakultatean irakasle eta doktore den Jose Luis Ayastuy oñatiarra etorri zitzaigun. Bere azalpenean unibertsitatearen nondik norako nagusiak azaltzeaz gain, Zientzia eta Teknologia fakultatean dituzten graduen berri ere eman zigun.

Azaroaren 19an, Batxilergo 2 mailako Zuzenbideko ikasleak Donostiako Justizia Jauregira joan ginen eta auzitegian bi epaiketa jarraitzeko aukera izan genuen. Maila bereko Mekanikako ikasleak, berriz,  Oñatiko Garay lantegian izan ginen,  eta fabrikazio prozesuaren atal batzuk eta materialen saiakuntzak egiten dituzten laborategia ikusi genituen. Psikologiako ikasleak, aldiz,  Donostiako ʺBCBLʺ garuna eta hizkuntzaren arteko erlazioa ikertzen duen zentroan izan ginen. Bertan, ikerketen emaitzen berri jaso eta laborategia ikusteko aukera izan genuen.